Ministria e Mbrojtjes - Arkivi 2008-2013

Ekipi i atletikës i FA shqiptare renditet në vendin e dytë në Kampionatin e 6-të Ndërkombëtar në Kroaci

24 korrik 2012

Foto Galeri

b_230_141_16777215_00___images_galeria_kulture_24_korrik_12_6.pngEkipi i atletikës së Forcave tona të Armatosura mori pjesë në aktivitetin e CISM, “Kampionati i 6-të Ndërkombëtar i Vrapimit në Mal – VISOČIA 2012”, i cili u zhvillua në periudhën 19-22 korrik 2012, në Gospić, Kroaci. Aktiviteti u organizua nga Ministria e Mbrojtjes dhe Shtabi i Përgjithshëm i Forcave të Armatosura Kroate, në bashkëpunim me Federatën e Atletikës dhe Komitetin Olimpik Kroat. Në këtë veprimtari sportive morën pjesë ekipe përfaqësues nga Kroacia, Shqipëria, Hungaria, Sllovenia, Serbia, Maqedonia, Mal i Zi dhe Bosnje Hercegovina. Në aktivitet merrnin pjesë edhe atletë profesionistë të kategorive të ndryshme nga klubi sportiv “Velebit” i qytetit Gospić.

Ekipi FA shqiptare u drejtua nga kapiten Engjëll Shehu dhe trajner kapiten Gernat Qirici. Forcat tona të Armatosura u përfaqësuan në këtë aktivitet me dy ekipe, për meshkuj dhe femra dhe më konkretisht: toger Bledar Mesi, nëntoger Renato Dorzi, PR II Vladimir Haxhiaj, PR II Josif Agolli, nëntetar Lorenc Haka, togere Xheni Skënderaj, togere Besjana Gjoka, nëntogere Migena Tresa dhe PR II Nertila Vata.
Aktiviteti zgjati dy ditë. Në ditën e parë, më datën 20 korrik, u zhvillua mbledhja teknike dhe njohja në terren me itinerarin e garës me pjesëmarrjen e shefave të delegacioneve dhe trajnerëve të ekipeve.

Vrapimi në mal në distancën 12.2 km për meshkuj dhe femra startonte në lartësinë 700m dhe përfundonte në lartësinë 1671m mbi nivelin e detit, në majën ‘Visočica” të malit Velebit. Terreni nga nisja e garës deri në kilometrin e 10-të karakterizohej nga një rrugë e pashtruar me një pjerrësi të konsiderueshme. Nga kilometri i 10-të deri në përfundim (2.2 km), terreni ishte i thyer me një kalim të ngushtë nga ku ishte e vështirë parakalimi.

Në ditë e dytë, më 21 korrik u zhvillua vrapimi ku morën pjesë 166 atletë nga vendet pjesëmarrëse dhe nga klubet sportive vendase. Gara filloi në të njëjtën kohë për të gjithë pjesëmarrësit, meshkuj, femra, atletë ushtarakë dhe civilë.

Ekipi i meshkujve të Forcave tona të Armatosura, i përbërë nga 4 atletë në përfundim të garës u rendit i dyti, vetëm pak sekonda nga ekipi hungarez që zuri vendin e parë në renditjen ekipore.

Në pjesën më të vështirë të garës në 2.2 km e fundit, ekipi ynë i udhëhequr taktikisht nga atleti profesionist dhe me përvojë toger Bledar Mesi, tregoi qëndrueshmëri dhe rezistencë duke arritur të kalojë disa atletë kryesues dhe duke ruajtur kompaktësinë deri në finish.

Ekipi ynë u vlerësua nga të gjithë si “ekipi surprizë”, me shpirt gare, i cili edhe pse me atletë amatorë, ku vetëm Bledar Mesi është atleti i vetëm profesionist, arriti të kalojë atletët profesionistë dhe me përvojë të ekipit serb, slloven e kroat, falë punës në grup dhe kompaktësisë gjatë garës.
Koha më e mirë nga grupi i atletëve tanë u arrit nga ushtari profesionist Vladimir Haxhiaj, me kohën 1h 12’ 14’’. Edhe ekipi i femrave, i përbërë nga 4 atlete, pavarësisht garës shumë të vështirë dhe të njëjtë me atë të meshkujve, e përfundoi garën dhe u rendit në vendin e tretë.